前無綫藝員岑潔儀(Zoey)喺2012年嫁咗畀馬來西亞富商老公Dixon,二人已經育有一子Damien,今年已經3歲,今年5月岑潔儀公佈再度有喜,認真可喜可賀!

Zoey今日就喺ig度貼咗一張性感孕照,但原來性感背後,呢位孕媽媽原來病病呢!佢留言話:「懷二胎真是不容易,身體特別多狀況發生,小老闆(囝囝)之前學校讀的那一班有兩個同學感染手足口病,我已經即刻停止他上學,但最終他都輕微感染,而我就好嚴重…… 口至少有五粒痱滋,手掌和腳都起了很多紅色小水泡,是很痛的,一接觸到紅點就很痛,捱了一個星期才好,孕婦抵抗力真的特別差,已經過了一半路程,希望接下來順利平安,無病無痛,健健康康生一個肥肥白白的小寶寶,這張照片就是最嚴重的那一天拍的」。

最後Zoey仲答謝幫佢影呢張靚靚孕照嘅兩位女攝影師 Emma 同 Kaoke,話佢哋冒住生命危險替她拍照。好多網民見到都留言,希望Zoey盡快康復,同要保重身體。今日《蘋果》聯絡到Zoey,問到佢手足口病痊癒未,佢話:「已經好番晒,不過之前真係好痛苦,因為冇藥食,至等佢(病)自己好。」

問到知道性別未呀?哥哥有冇好興奮?Zoey就話:「性別過二個星期後先知,哥哥好開心,日日都kiss 我個肚肚,so sweet。(心唔心急想知?)冇呀,知道健康已經勝過一切,爸爸緊張d,好想要多個仔,係呀,佢傳統大男人,特別對仔有偏愛,生女佢怕將來個女嫁出去,會好傷心,但係我就想要個小公主囉!」

(on.cc東網)