內地女星趙薇由「小燕子」到影后到做埋導演,紅透半邊天~

追隨佢嘅粉絲多不勝數,入屋得嚟又係女強人,真係女藝人嘅典範!

佢早前激減15Kg,少女味即刻返晒嚟!

農曆年假結束後,趙薇近日正式開工。佢着上厚厚棉衣現身片場,頭上仲戴住冷帽,再加上一個大口罩遮掩其素顏樣,成個人雖然顯得「糭」脹咗,但其招牌大眼睛就非常搶鏡,遠處一睇就知係佢!

當趙薇遇上同組嘅工作人員時,佢先至拉下口罩交談,幾個人有講有笑,心情靚爆!

眾人仲高興地圍埋一齊煲煙,但喺吞雲吐霧之間,隱約見到歲月喺影后面上留下了滄桑,皮膚睇落暗淡無光之餘,黑眼圈同眼袋仲非常明顯,唔少網民都話佢成個人睇起嚟好憔悴!

另外,近日有網友晒出趙薇、陳坤、黃曉明嘅北京電影學院學生學籍表,表中見樣貌青澀嘅佢哋,同是1996年考入北京電影學院表演系本科班,經過多年打拚後,依家各自都喺演藝圈闖出一片天,難怪被封為「北影三劍客」。

(on.cc)