視后胡定欣雖然演技了得,但有睇過佢喺《美女廚房》嘅表現,都知道定欣厨藝確實嘛嘛哋。

不過,定欣冇咁易放棄,盡力惡補廚藝,誓要除去「地獄廚神」呢個封號,而最近佢就喺社交網發文。

定欣先從甜品入手,見佢日復日咁練習整Pancake,每次都有影低畀網民評分…

去到前日,佢勁滿足咁留言話︰「Good afternoon 今日點睇呢?你哋應該講咗句 『胡定定係咪癡咗線?由朝整到晚!』係! 我應該係傻咗,係開心到傻咗! 因為太有滿足感!~~~~」

見到佢好有心機咁用隻花花碟裝住,又加埋士多啤梨同忌廉做裝飾,賣相相當吸引!

引嚟一眾網民激讚,就連「蕭太」黃翠如都話想食。

至於老友陳山聰唔抵得寸爆留言︰「請問是甚麼東西,打風中的梳乎厘」,定欣即時嬲嬲豬回覆︰「你返唐人街啦……」

陳山聰曾試食定欣作品,大家睇山聰個樣…

而日前定欣仲整咗新產品朱古力心太軟,大家覺得賣相點先?

又邁進成功喇!

「胡說八道會」嘅黃智雯、姚子羚同埋楊洛婷都舉手話要食!

 

睇嚟定欣今次可以洗甩「地獄廚神」封號,成為「美女廚神」﹗

 

 

 

 

 

(綜合報道 / ig / on.cc)