歌手古巨基一連五場假紅館來到尾場,獲老闆楊受成博士夫婦、溫碧霞、森美、李克勤、張智霖夫婦、唐詩詠、羅力威等圈中好友撐場,全場爆滿非常墟冚!雖然基仔於第二場意外墮台,拉傷肩頸,但來到最後一場,他貌似回復狀態,被Dancers抱上抱落都輕鬆自如,對比起騷前拜神時判若兩人,未知是否強忍肩頸痛演出。

成班Dancers圍住基仔做Ending Pose嗰時佢笑話:「要離開中間位先,但又唔使咁過,再過就上觀眾席。」安全行開大窿後,他抵死自嘲話:「見過鬼怕黑,我見過嗰隻鬼都幾大隻,所以都幾怕黑。」全場即歡呼拍掌。基仔續話相信在場觀眾都有睇過嚟幾日嘅新聞,都知道他的狀況,大派定心丸之際,貪玩的基仔都不忘再嚇觀眾話有後遺症:「真係謝天謝地,死唔去,睬!係不幸中之大幸,睇完醫生佢話可能會有後遺症,都幾長手尾,可能唱歌會好聽咗,發聲系統好好多,依家肩頸肌肉都梗梗哋,但我會克服佢,帶畀大家好好嘅演出。」引來全場觀眾大笑,基仔隨即送上歌曲《必殺技》。

來到演唱會第三部分,基仔唱《子華說》前打趣話:「啱啱唔記得咗講,嗰後遺症除咗唱歌好聽啲之外,跳舞都會勁啲。」隨即戴上黑超,與Dancers載歌載舞,期間好像完全忘了傷痛,頸部亦郁動自如,仲與Dancers於道具小巴內爬上爬落跳舞,落力跳足15分鐘Dance Medley,震撼全場認真犀利!全場報以熱烈掌聲支持。

 

(on.cc)