藝人李漫芬(Fanny)日前擔任兒童慈善catwalk比賽嘅星級評判,身為媽咪嘅佢話好開心可以參與呢類工作:「好鍾意呢啲工作,做咗媽媽之後,見到好多小朋友就覺得好玩又開心,希望日後多多參與呢類活動。」

Fanny仲大讚今次參賽嘅小朋友質素好高:「佢哋第一次上台都唔驚,比我更厲害,記得我第一次上台做司儀都緊張㗎,我要向佢哋學習。我都有幻想如果第時我個女參加呢類比賽會係點,應該好得意。」Fanny仲上台大展歌喉,令現場氣氛更加好。

另外,Fanny最近接拍新劇,劇中佢會飾演高海寧經理人,佢表示:「好有挑戰性,劇中高海寧角色好固執,好堅持己見,我就幫佢處理,轉數要好快,好多謝監製畀呢個機會我。」Fanny為咗劇集仲刻意收身,佢都話自己已經完全回復狀態,睇落又真係好Fit呢!

不過Fanny透露其實囡囡在心發緊燒,完成工作之後佢就趕返屋企照顧囡囡,佢表示:「當晚差啲入急症,好彩之後好番啲,天氣凍,各位媽媽要小心。」

 

 

 

 

 

 

(ig  /  on.cc)