藝人江若琳同「生煎包王」蕭潤邦(Oscar)今日正式結婚,尋晚(22日)Oscar已經喺社交網upload上頭相,做好準備今日娶老婆。

佢留言:「上頭既(嘅)時候,塊鏡點解有條女響後面既(嘅)」見到Oscar着到紅噹噹,非常Sharp醒!

雖然暫時一對新人仲未「現身」,不過佢哋嘅兄弟姊妹團就已經急不待曝光二人今早接新娘嘅情況!

姊妹團員之一嘅張紋嘉(Crystal)首先PO張靚靚自拍,透露姊妹裙款式!

佢仲上載埋江若琳同媽媽手仔捉手仔難分難捨嘅一刻,兩母女眼神又感動又不捨,真係好感動!

而小肥亦有「劇透」自己嘅「伴娘衫」,吊帶工人褲上陣嘅佢就興奮話自己第一次做姊妹,就已經榮升做伴娘!

而JW男友葉韋彤(Tarzan)就做兄弟,佢upload咗Oscar正準備上門接新娘時嘅情況。

見到Oscar手上一大疊銀紙,另一位兄弟再拎住另一疊,多到連利事封都入唔落,睇嚟Oscar銀彈充足!

加埋佢企喺大紅花轎前面Chok晒甫,隨時可以上門接新娘喇。

Tarzan全程直擊蕭潤邦喺酒店接新娘過程,片中所見,姊妹團一見到班兄弟冇開門利是就即閂門,認真夠絕!

好彩最後都順利過到開門呢一關,跟住就見到Oscar同班兄弟團就穿上美少女戰士服裝,佢仲被要求戴上「口腔固定器」,開頭Oscar拒絕戴上,佢話自己口唇爆咗,但係最終都屈服。

而做兄弟嘅謝安琪就喺旁邊拍手附和,場面搞笑又熱鬧。

最後,Oscar隔住門向江若琳講愛的宣言,現場有人起哄問佢11年嚟有幾多條女,佢即刻話冇呀!冇呀!

 

(綜合報道)