決定咗喺本月18號正式拉埋天窗!恭喜恭喜~日前兩公婆就去到山頂影婚紗相,短短兩個鐘就完成,認真犀利!

中、德混血名模貝安琪(Ankie)即將喺本月18號同加拿大籍男友Simon van Damme拉埋天窗,喺香港舉行婚禮兼註冊,日前兩公婆就去到山頂影婚紗相,Ankie點名由攝影師Ali Ghorbani操刀拍攝,用咗短短兩個鐘就完成,捕捉日落前嘅magic hour,拍攝出自然唯美一面。

早前透露會在香港影婚紗相的她表示要保密,其唯美婚紗造型終於曝光,上身以碎花加喱士為主呈現裸背效果,端莊亦不失性感,與筆挺西裝的未婚夫鼻貼鼻流露一臉幸福。婚照中即將兩歲的兒子亦有現身,見他在草地上踢足球,Ankie與未婚夫望着兒子,一家三口滿載溫馨。

Ankie去年2月誕下囝囝Sebastian(小龍),婚紗相除咗兩公婆,緊係唔少得小龍一份,喺車度瞓晏覺叉足電後,小龍出現嘞!但係近排特別黐身嘅佢唔係搵爸爸就係要搵媽媽,搞到大家喊笑不得,不過熱愛足球嘅小龍一見到足球心情好快就平靜落嚟,仲同父母玩到癲晒,乖乖完成一家三口合照。Ankie話:「加埋小龍,特別有意思,3個一齊特別開心,小朋友係好活潑。」

仲有兩星期就真正成為人妻,Ankie話:「好開心,就嚟到、就嚟完成,其實一路籌備都唔太辛苦,但最後係因為家人同朋友嘅意見就辛苦少少,不過我依家都唔係好理,我哋兩個先最重要,媽咪話我係太西方嘅諗法,我始終喺德國長大,但都好尊重中國傳統文化,一定會擺酒嘅,18號會係好細嘅party,先註冊,我哋決定明年再搞一次中式同一次自己嘅婚宴,中式嘅媽咪全權搞晒,咁樣個個都開心。」

(Apple daily/on.cc)